Sir Tom Jones (UK)

Tysnesfest er stolte over å annonsere at sjølvaste Tom Jones (UK) kjem tilbake til festivalen i 2025 på sin Defy Explanation Tour – 10 år etter han sist trollbatt publikum!

60 år med «It’s Not Unusual»

Den walisiske superstjerna er ikkje berre ein av dei største songarane gjennom tidene – han er også i sitt livs form. Med ein karriere som strekkjer seg over seks tiår og over 100 millionar selde album, er han ein av musikkhistoria sine verkelege ikonar.

I 2025 feirar Tom Jones 60-årsjubileet for sin verdskjende hit «It’s Not Unusual», låten som gjorde han til ein internasjonal superstjerne i 1965. Sidan då har han levert tidlause klassikarar som Delilah, Sex Bomb og Green Green Grass of Home, i tillegg til kritikarroste utgjevingar det siste tiåret.

Ein magisk kveld ventar

Anmeldarane seier at Tom Jones syng betre enn nokon gong. «Han syng som ein gud,» skreiv avisa The Skinny etter ein av hans siste konsertar. Dei nyaste albuma hans har fått strålande kritikkar, og i 2021 vart han den eldste artisten nokon gong til å toppe UK Albums Chart med ny musikk.

Konserten på Tysnesfest blir etter alt å døme hans einaste festivalshow i Noreg sommaren 2025, noko som gjer dette til ein sjeldan sjanse til å oppleve ein levande legende på scena. Dette blir ein kveld for historiebøkene!